阮兆祥將會喺5月20至22日舉行《硬食放題棟篤笑》，今日喺商台搞記者會，扮財政司司長曾俊華坐車出場，笑話坐住70萬硬食放題車，一邊食一帶一路，而祥仔話騷中一路考慮「食字」，食住赤字同褔山雅治。佢話:「有人提議台上表演彈結他，我唔會好似陳祖澤唱大戲，或者CY同記者唱《朋友》。」佢仲頒車牌畀扮中東油王嘅陳志雲，慶祝商台續牌成功。
祥仔會扮財爺到深水埗、旺角等地區派糖，問佢怕唔怕有人認錯，陳志雲話:「證明係成功啦！財爺依家受歡迎，認錯梁振英就話驚。」……突然間好似有幾隻烏鴉喺頭頂飛過…
祥仔話騷中少不免講到政治，話金像獎今年「最佳電影」都成政治話題，問佢會唔會講《十年》？祥仔話可考慮，只係未必會批評。
陳志雲笑祥仔騷中應不敢扮余詠珊，祥仔話:「我冇話唔敢，因佢係幕後，大家只識外在而唔認識特質。」問佢係咪怕有「方丈」，祥仔話:「唔係，素材唔同。」講完又對陳志雲話:「你掘個窿畀我！」陳志雲即笑道:「你話余詠珊係窿！」祥仔即刻兜番話:「Sandy(余詠珊) is not alone。」
祥仔即場邀請陳志雲做嘉賓，但陳志雲笑謂:「你520（5月20）做，又唔係620。」記者提議一個扮樂易玲，另一人扮余詠珊，陳志雲話:「扮620易啲，佢化妝較濃，余詠珊都『唔化』……係唔化妝，佢腳趾好靚，成日著露趾鞋。」