淡菜，勿是蔬菜，是一种贝壳，我忖呒没几个海岛人勿晓得的。 其正式名称是“贻贝”。
嵊泗构杞的淡菜在浙东还是蛮有名气的。 该边向的淡菜，个头大，肉壮，清爽，味道好。 每年一到四五月份，构杞的淡菜没船没船驮勒泗礁去卖。
每埭热天光搭泗礁去，淡菜总归要吃的。 我的吃法就两种，烤淡菜，青椒炒淡菜。烤淡菜的做法蛮简单的。淡菜买来，先搭淡菜一只一只分开，搭其像草一样的茎折了，再在水里向漒两道，就好摆勒镬里向了。 镬里向水、盐统统勿摆。 镬盖盖好，就好烤了。 淡菜一开口火就关了，就好撩出来上桌了。 咋吃呢? 我是揾酱油吃的。 也可以揾米醋，随侬欢喜。 青椒炒淡菜的做法也蛮简单的。 该侬注意：青椒是菜椒，勿是辣椒。 淡菜烤好，搭其肉剥出来。淡菜肉上头还有茎的话，搭其折了。 要炒辰光先倒一埃生油，油烧热，青椒搭淡菜肉聚头倒进去，火要大。盐摆一埃。莫炒勒太老了。 还有各种各样的吃法，看各人的吃口了。
我欢喜吃淡菜勿单单是因为淡菜味道鲜，还有一个重要的原因，淡菜价钿便宜。一般勒两三块一斤，壳剥了也呒没十块。现晌介谁下饭还介便宜噢？！ 我还来的忖了：下埭搭泗礁去，回来要带十斤还是廿斤淡菜肉？
格为啥讴“淡菜”？ 有种话法是格么介的，新鲜淡菜烤熟，肉剥出再晒成淡菜干是不摆盐的，“淡菜”就格么介讴出来了。 我忖该种话法蛮有道理的。 不过，“菜”字呒没话。 “菜”字咋话呢？我忖是格么介的。 淡菜在海水里向辰光统是一只一只生勒聚头的，就像一串又一串的香蕉，每只淡菜统有一梗茎连上去，该梗茎看上去真的搭植物的茎差勿多。 淡菜就格么介一只一只吊的，像藤高头结出来的果实。 我忖该就是“淡菜”名字里向“菜”的原故了。
原载于“舟山话吧”，略作修正。