韓國綜藝節目《勇敢的記者們3》每次都邀請記者上節目玩爆料，噚日一集就爆女團成員嘅感情事。
當中提到某女團嘅A成員曾經同一位韓流明星拍拖，喺節目上記者就話：「呢位女團成員喺一次活動上表現好辛苦咁，當時有傳聞佢有恐慌症，不過真正令A痛苦就係男人。」
當時A認為只要正式出道後，佢就可以轉移視線令自己冇再咁辛苦，點知反而越來越辛苦，因為同團成員比自己更加靚同受歡迎，令佢更加傷心，同時佢又認識咗那位韓流明星，點知二人拍拖時間唔算長，事關韓流明星係女團殺手，成日都會追求女團成員，最終令A更加低落，唔想再參與團隊活動。
而A同韓流明星分手後，轉而同普通男性B某拍拖，雖然公司唔想A掛住拍拖影響工作，但A就唔理咁多，戀愛大過天，仲寧願唔出席團隊活動，陪男友去旅行拍拖，對其他成員都大受影響。
節目出街後即時惹來網民議論紛紛，網民都一致認為節目所講就係女團AOA嘅草娥，事關草娥之前被爆冇現身團隊活動成兩個月，之後就爆出佢撻着企業家粉絲，不過網民就估唔到到底韓流明星係指邊個，有網民就話呢個節目唔可信。