2011年港姐冠軍朱晨麗（朱朱），加入無綫後近年獲力捧，她亦把握機會，每部劇都花盡心思演出。繼早前於劇集《棟仁的時光》放下港姐身段、豁出去跳火辣鋼管舞後，朱朱日前拍攝另一新劇《特技人》攞條命仔較飛！劇情講述飾演特技人的她因心情低落，危坐12層樓高的唐樓天台，還要穿上高踭鞋游走於天台邊緣，場面驚險！譚俊彥（Shaun）因誤會朱朱做傻事而強行將她拉走。
加重保險：跳嗰刻好驚
拍攝該場戲前的準備工夫做到足，朱朱與Shaun不斷睇位。埋位時，穿上高踭鞋的她在天台邊緣走來走去，絲毫沒有怯慌，當與Shaun拉扯期間，雙腳還多次凌空飛踢出天台外，期間僅靠兩條極幼的威吔保護，睇見都牙煙！事後，朱朱透露是首次為拍劇吊威吔，幸好沒有畏高，故能輕鬆完成。平時愛玩機動遊戲的她笑言雙腳伸出去一刻，感覺好興奮：「其實我都幾鍾意拍呢種場面，之前拍咗一場真係要跳落樓嘅戲，雖然跳落去嗰一刻真係好驚，但其實有工作人員睇實同對位，非常安全，所以好快克服到呢種恐懼感！」又笑言因着地時不慎撞到腳趾，導致行路一拐一拐，幸好沒影響演出。不過，由於《特技人》有大量特技場面，朱朱亦坦言事前有為自己的保險加碼，希望拍得安心一點。
同樣飾演特技人的Shaun講到將朱朱拉起一幕時展現強勁臂彎，毫不費力便將對方整個人抱起，問到對方是否輕磅？他笑說：「佢愈來愈輕啦！拍得咁辛苦。（抱起佢感尷尬？）咁又冇，係啱啱抱起佢時唔小心隻手撞到佢個嘴兩次，要請番佢食飯補數！」朱朱則讚拍檔專業，不擔心觸及敏感部位引起誤會。提到朱朱危坐天台，Shaun自言拍過不少驚險場面：「試過上會展樓頂拍，都唔記得當時有冇威吔班，拍檔仲玩拋銀仔伸隻手出去接。」
評估風險 備武師頂替
對於演員賣命演出，監製王偉仁讚表現專業，並直言無綫拍攝一切以安全為上，亦有為演員保險加碼：「每位都想盡力親身演出，好多人收到劇本時已經積極做訓練，公司都鼓勵佢地親身演出，但從來冇要求一定要咁做！身為幕後，我哋比演員更擔心！公司幫佢哋特登買重保險，因為呢啲係必須嘅，加上每場特技場面都有預算去安排替身同武師到場，如果評估過真係太危險，我哋都唔會畀演員冒險。」